ఢిల్లీలో రాహుల్ గాంధీ గర్జనకు విశాఖ తోడు

విద్యార్థుల కోసం వీధుల్లోకి దిగుతాం ..

…అడ్డాల వెంకట వర్మ రాజు…

విశాఖపట్నం, జూలై 22
అక్షర చాతుర్య

ప్రధానమంత్రి నివాసం ముందు విద్యార్థుల తరఫున రాహుల్ గాంధీ చేపట్టిన చారిత్రాత్మక ధర్నాకు విశాఖ జిల్లా కాంగ్రెస్ పార్టీ పూర్తి మద్దతు ప్రకటించింది. ఈ పోరాటం ప్రతి యువత, ప్రతి సామాన్య కుటుంబానికి సంబంధించినదని, అవసరమైతే విశాఖ వీధుల్లోనూ ఆందోళన చేస్తామని విశాఖ జిల్లా కాంగ్రెస్ అధ్యక్షులు అడ్డాల వెంకట వర్మ రాజు, (హాసిని వర్మ ) బుధవారం పత్రిక ప్రకటన ద్వారా హెచ్చరించారు.

ప్రశ్నాపత్రాల లీకులు, పరీక్షల అవకతవకలతో లక్షలాది విద్యార్థుల భవిష్యత్తు అంధకారంలో పడుతున్న తరుణంలో, ప్రధానమంత్రి నివాసం ముందు రాహుల్ గాంధీ ధైర్యంగా నిలబడటం దేశ ప్రజాస్వామ్యానికి కొత్త స్ఫూర్తిని ఇచ్చిందని ఆయన అన్నారు.

"అధికార కేంద్రం ముందు కూర్చొని ప్రజల గొంతు వినిపించడం అందరికీ సాధ్యం కాదు. తోపులాట, బలప్రయోగం జరిగినా వెనక్కి తగ్గకుండా రాహుల్ గాంధీ విద్యార్థుల పక్షాన నిలిచారు. ఇది కేవలం ఒక ధర్నా కాదు. ఇది ప్రజాస్వామ్యంలో ప్రజల స్వరం ఎవరికీ తక్కువ కాదనే సందేశం" అని అడ్డాల వెంకట వర్మ రాజు పేర్కొన్నారు.

భారత్ జోడో యాత్ర నుంచి నిరుద్యోగం, ధరల పెరుగుదల, రైతుల సమస్యలు, పేపర్ లీకుల వరకు ప్రతి అంశంపై రాహుల్ గాంధీ నిరంతరం ప్రభుత్వాన్ని ప్రశ్నిస్తున్నారని ఆయన గుర్తుచేశారు. విద్యార్థులు, రైతులు, మహిళలు, అణగారిన వర్గాలకు అన్యాయం జరిగిన ప్రతిసారి ఆయనే ముందుండి పోరాడారని చెప్పారు.

ఢిల్లీలో జరిగిన ఈ పోరాటాన్ని చూసి దేశ యువతలో కొత్త ఆశ పుట్టిందని, రాహుల్ గాంధీని ఇప్పుడు కేవలం ప్రసంగాల నాయకుడిగా కాకుండా ప్రజల కోసం వీధిలోకి దిగి పోరాడే నాయకుడిగా చూస్తున్నారని ఆయన అన్నారు.

ఈ నేపథ్యంలో విశాఖ జిల్లా కాంగ్రెస్ పార్టీ తరఫున త్వరలో భారీ నిరసన కార్యక్రమం చేపడతామని అడ్డాల వెంకట వర్మ రాజు ప్రకటించారు.
"ఢిల్లీలో రాహుల్ గాంధీపై జరిగిన దాడిని, విద్యార్థుల గొంతు నొక్కే ప్రయత్నాన్ని మేము తీవ్రంగా ఖండిస్తున్నాం. విద్యార్థులకు న్యాయం జరిగే వరకు మా పోరాటం ఆగదు. కేంద్రం వెంటనే స్పందించి పేపర్ లీకులపై కఠిన చర్యలు తీసుకోవాలి. లేకుంటే విశాఖ నుంచి దేశవ్యాప్త ఉద్యమానికి నాంది పలుకుతాం" అని ఆయన హెచ్చరించారు.

ప్రజాస్వామ్యాన్ని కాపాడేందుకు, యువత భవిష్యత్తును నిలబెట్టేందుకు రాహుల్ గాంధీ చేస్తున్న పోరాటానికి విశాఖ జిల్లా కాంగ్రెస్ కుటుంబం అండగా ఉంటుందని అడ్డాల వెంకట వర్మ రాజు స్పష్టం చేశారు.