మూడు దశల్లో స్థానిక సమరం!
అమరావతి, సెప్టెంబరు 10
అక్షర చాతుర్య
ఏపీలో స్థానిక సంస్థల ఎన్నికలకు తెరలేవబోతోంది. రాష్ట్ర ఎన్నికల సంఘం భారీ కసరత్తు మొదలుపెట్టింది. ఈసారి ఎన్నికలను రెండు దశల్లో కాకుండా మూడు దశల్లో నిర్వహించేలా ప్లాన్ రెడీ చేస్తోంది.
తొలి దశలో పురపాలక పోరు…
మొదట మున్సిపల్ ఎన్నికలతోనే సందడి మొదలుకానుంది. కోర్టు కేసులున్న 23 స్థానాలను పక్కనపెట్టి మిగిలిన చోట్ల ఎన్నికలకు రంగం సిద్ధం చేస్తున్నారు. తొలి విడతలో ఏకంగా 59 పుర, నగరపాలక సంస్థలు, నగర పంచాయతీల్లో ఎన్నికలు జరగనున్నాయి. ఇందులో విజయనగరం నగరపాలక సంస్థతో పాటు మరో 58 మున్సిపాలిటీలు, నగర పంచాయతీలు ఉన్నాయి. అధికారులు ఇప్పటికే దాదాపు ఏర్పాట్లు పూర్తి చేశారు.
ఇప్పటికే ఈ నెల 3వ తేదీన డివిజన్లు, వార్డుల వారీగా ఫొటో ఓటర్ల జాబితాను ప్రచురించారు. ఈ నెల 13 నాటికి పోలింగ్ కేంద్రాల ఏర్పాటు పూర్తి కానుంది. 21వ తేదీ నాటికి ఓటర్ల జాబితా నుంచి ఎస్సీ, ఎస్టీ, బీసీల గుర్తింపు ప్రక్రియ, 25వ తేదీ లోగా మేయర్లు, మున్సిపల్ చైర్మన్లు, కార్పొరేటర్ల రిజర్వేషన్ల ఖరారు ప్రక్రియ పూర్తి చేయాలని టార్గెట్ పెట్టారు.
రెండో దశ, మూడో దశ ఇలా..
రెండో విడతలో మిగిలిన 41 పుర, నగరపాలక సంస్థలు, నగర పంచాయతీలకు ఎన్నికలు జరుగుతాయి. వీటికి సంబంధించిన వార్డుల పునర్విభజన ఈ నెల 14తో పూర్తవుతుంది. అలాగే రాష్ట్రవ్యాప్తంగా 10,047 ఎంపీటీసీ, 660 జడ్పీటీసీ స్థానాలకు ఓటర్ల జాబితా తయారీ ఈ నెల 11వ తేదీతో ముగియనుంది.
ఇవి పూర్తయ్యాక అసలైన పల్లె పోరు మొదలవుతుంది. మూడో దశలో రాష్ట్రంలోని 13,295 గ్రామ పంచాయతీలకు ఒకే విడతలో ఎన్నికలు నిర్వహించేందుకు ప్రణాళికలు సిద్ధమవుతున్నాయి.
వచ్చే ఏడాది జనవరి నాటికి రాష్ట్రంలోని అన్ని స్థానిక సంస్థల్లో కొత్త పాలకవర్గాలు కొలువుదీరేలా ఎన్నికల సంఘం తుది కసరత్తు చేస్తోంది. అధికార, ప్రతిపక్ష పార్టీలు కూడా ఈ ఎన్నికలను ప్రతిష్టాత్మకంగా తీసుకోవడంతో ఏపీలో పుర పోరు రసవత్తరంగా మారబోతోంది.
